 |
 |
「跳車傷亡機率仲大」
|
| 發稿日期: 29/1/2010 |
【本報訊】落選港姐、無綫電視女藝員李穎芝，昨晨乘的士往大角嘴拍劇途中，的士駛至何文田佛光街落斜時，疑腳掣失靈左搖右擺，李穎芝在 15秒的生死一念間，決定不顧一切開門跳車逃生，結果倒地雙腳受傷。的士續溜前 60米始停下，李事後頻呼：「好彩後面冇車咋，家諗番起都驚！」
昨晨 7時許，李穎芝在紅磡高山道截乘由 53歲姓徐司機駕駛之的士，前往大角嘴奧海城拍攝《女人最痛》劇集。的士駛出佛光街沿中線落斜期間，徐發現腳掣失靈，「踩極都冇反應」。李穎芝形容當時好似「跑馬仔咁窒吓窒吓」，整部的士左搖右擺，「我見到個司機拉手掣，仲聽到 act一聲。」惟的士仍不斷溜前，嚇得她失聲大叫：「發生咗乜嘢事呀？」徐當時拉起手掣手忙腳亂說：「我都唔知道！」
徐拉起手掣仍未能煞停的士，繼續溜前，李穎芝事後說：「我驚部車有事呀，個腦諗緊跳唔跳車好，如果唔跳，驚同部車一齊撞！」就在這生死 15秒間，她決定解開安全帶，打開左後門跳車，一仆一碌跌在慢線。的士則以慢速溜前 60米，至佛光街房委會總部對開始告停下，並無損毀。
司機下車走回頭查看李穎芝情況，還問她是否繼續乘車，李穎芝當時右腳膝蓋、左腳腳踝分別擦傷及扭傷，她自行報警求助。救護員到場替她包紮後送院治理，警員則召拖車將肇事的士拖走檢驗。李穎芝經治理後無礙出院。
落選港姐晉身娛圈
李穎芝事後猶有餘悸，但不會因此怕乘的士，「其實都唔關個司機事，係架車嘅問題。」無綫外事部副總監曾醒明表示，李穎芝已向劇組請假三天，由於她在新劇中佔戲不多，不會影響拍攝進度。姓徐肇事司機則指李穎芝是他昨日開工首名乘客，又謂事發時車速很慢，「佢唔係跳車，係行落車啫！」
現年 23歲的李穎芝洋名 Wendy，香港出生，早年舉家移民美國， 04年在當地參加紐約華裔小姐競選，與陳法拉同進入最後五強，最後不敵落敗； 06年回流參選港姐亦鎩羽而歸。其後她參加藝員訓練班，正式成為無綫合約藝員，曾在無綫遊戲節目《一擲千金》中擔任其中一名千金小姐，亦在劇集《宮心計》中演過婢女、在《畢打自己人》演過女藝員一角。
「跳車傷亡機率仲大」
【本報訊】的士疑腳掣失靈無法煞車，李穎芝不顧危險跳車逃生，專家認為遇上此情況，司機及乘客應保持鎮定，司機除拉手掣減速，亦應盡快轉低波，並應響號通知其他道路使用者，而乘客則應扣緊安全帶，俯身抱頭屈膝保護頭部，將意外的受傷程度減至最低。
拉手掣小心車擺尾
香港駕駛學院車隊培訓及發展經理謝錦華表示，腳掣失靈可能與長時間使用腳掣，令煞車系統過熱失效有關，肇事司機在過程中拉手掣做法正確，但要一按一放「就住拉」，以免的士擺尾，並應盡快轉低波，同時響號警告其他道路使用者。
謝直言李穎芝跳車僅受輕傷非常好彩：「跳車可大可小，跌落地撼到石頭、玻璃，可以好重傷，所以乘客應扣好安全帶，俯身雙手抱緊頭部，減低傷亡。」
香港汽車工業學會會長李耀培也表示，乘客跳車非常不智，「後面有車會輾過跳車嘅人，傷亡機率仲大。」他建議司機遇事時盡快轉低波及拉手掣，如仍未能煞車，應靠左將車身挨住牆身或防撞欄以求停車，但切勿藉撞牆或欄杆煞車。他建議的士行駛約 9,000公里便須作檢查。
|
 |
|
|
|
|
|
